سؤال في صدري

[عبدالله مناور البدراني]

عندما تخيب آمالك في شخص كنت تضن أنه سوف يقف معك عند الحاجة لاتدري ماذا تقول وتصاب وقتها بالحيرة والذهول أهذا صديقي فلان معقول ؟ ! فعلاً أصبحنا في زمن قليل ونادر من يوفي ويخلص نيته معك !!! كل هذا وذاك ترجمته في هذه الأبيات .
( سؤال في صدري )


أشره على اللي يستحق المشاريه=صاحب وله عندي معزة كبيرة
كنت افتخر به يومها الناس تطريه=وأذخر بمثله لليال العسيرة
على الوفا يقلط وبالعز أقهويه=وليا تحزم بي لقاني نصيره
وإذا هقا مانيب أضيع هقاويه=يطلب ويامر كل علمن نديره
لكن تغيّر واختلف في مباديه=يا الله عساه الوقت يجبر كسيره
وش ذنبي يعني اللي انا مسويه=ونا على وضح النقا والبصيرة
سؤال في صدري ولاني بمخفيه =لو كنت من راع العقول المنيرة
ماابي إجابة فيها لفٍ وتمويه =أبي إجابة حق لو هي قصيرة
لكن على الله من ظلمني ابشكيه=ياخذ بحق الأولة والأخيرة
ويا الله من غدْر الزمان وبلاويه=ويا الله عسى في تالي الأمر خيره
= أبووليد
رد الشاعر / ذعار لافي العوفي :

أبو وليد اليوم ناوي أجاريه = بأبيات من صاف الفؤاد وضميره
العلم واضح مايبيله تماويه = جاتك من العوفي بلبس القصيرة
محشومةٍ عن ناظر الحسد والتيه = تمشي على وضح النقا مستطيرة
تلبي نداء للي يبث المشاريه = وتجاوبه قبل الجموع الغفيرة
أبو وليد اليوم بانت مشاكيه = ومن قوة الآلام داخل بحيرة
ومعذور يوم انه تفاجأ بما فيه = وأهل الوفا مصدومة ٍ بالحقيرة
خطاك يا الطيب من الطيب تعطيه = والنذل يبقى نذل ماشفت خيره
ومن جالس النمام وأرخى آذانيه = اختل ميزانه وشك بعشيرة
إلا وفيٍ ماتزعزع مباديه = يغادر المجلس ماذاع السريرة
ويعطيك علم ٍ وزبده العلم تاليه= يا الله عسى تاليه علم وبصيرة
خله يهف وهفت مقيط تكفيه = وان كان ماتكفيه هاك الذخيرة
وتحمد الله يوم بانت خوافيه = قدام لا تحتاج له في كبيرة
الثور يبقى ثور تكبر علابيه = وكسر الجمل ماتفيد فيه الجبيرة

رد الشاعر /سالم رجاء الجابري :

حي الكتاب اللي لفتني معانيه = تفهق معانيه الظلام وتنيره
من شاعرٍ بالروح والمال نفديه = له في وسط صدري منازل وديرة
يامرحبا ترحيب غالي بغاليه = باللي شكا من جور الأيام حيره
هذا الزمن واجب على الناس تبكيه = فيه الوفا جاته خيولٍ مغيره
فرسانها ياضيف غدر ومشاريه = إن طعتني من راح واقفت خطاويه
لا تنشده مقفي على آيات ديره = لوّح له بكفك عسى الله يجازيه
خسران هالمقفي ونعرف مصيره = بكره يعود وميسم الوقت كاويه
لو ارتوى الظامي يعود لبيرة = عزي لمن يقفي عن اعدود ترويه
ناسٍ تمثل طيبها بالمسيرة = كم من عمى عرفه ليا اقفى يقديه
من لا عرف قدرك تراني معاديه =واعقبه فنجال كيف(ن) نديره
وختامها لك شطر مني ابهديه = يبقى الشجر شامخ ولو طار طيرة

رد الشاعر / معوض نافع السهلي :


يامرحبا باللي نعزه ونغليه = يامرحبا ياضيف ياطيب السيرة
هذا زمن ياضيف بآخر لياليه =ضاع الوفا والطيب بأرض الجزيرة
لاتشتكي ياضيف وتقول وش فيه =خلك على ماقيل سرٍ ببيرة
صاحبك يمشي معك مادمت تعطيه =وعند الشدايد صار ظهره يديره
اللي يبيعك بعد ماكنت شاريه =لا تتبعه خله يواجه مصيره
لا بد مايندم على اللي مسويه =طال الزمن ولا الليالي قصيرة
وختمامها بطلب من الله وارجيه = تبقى صداقتنا سنين ٍ كثيرة