المساعد الشخصي الرقمي

مشاهدة النسخة كاملة : قصيدة في المقناص،، لبن مدعث،،


بعيد المراميس
26-12-2006, 01:18 PM
الاخوان الاعزاء اليكم هذه القصيده @ اتمنى ان تحوز على رضاكم



أنا ليا ضاق صدري واشتعل جاشـي = داويت نفسي مـن همـومٍ تناهشهـا
وضربت لي طرقةٍ تصعب على اللاّشي = وسرّيت رجلي ومسرى الليل ينعشهـا
ونحرت جوٍّ خليٍّ يوحـش أوحاشـي = صحاصح البيد طـبّ اللـي يعايشهـا
خالٍ جنابه مـن العالـم والأدباشـي = قفرٍ مربّ الوحوش ومأمن أوحشهـا
عشبه سوات الحمى ماهوب ينّاشـي = لا راعي البل ولا الشـاوي بنايشهـا
مايقطعن فرجتـه حـرار الأبواشـي = الضمّر اللي وصوف الريـم تركشهـا
مايسهجه غير جيبٍ يطرب الماشـي = مع واعر الأرض وألاّ مع مفارشهـا
جيبٍ يبعّد عـن مْعشّـاي مغباشـي = اللي يقـصّ الـدروب ليـا تناوشهـا
ماتسمع من المكينه غير وشواشـي = ماكنّـه ألاّ الحيايـا فـي توشوشهـا
لا فرّ من دوس رجلي صابه خراشـي = فـرّة قطـاةٍ دويّ الملـح خارشهـا
يطيش من طيش سوّاقه ليـا طاشـي = نوبٍ يخم الخطـوط ونـوب يقرشهـا
أبيه لابـان نجـم ونجـم متلاشـي = وشفت السويبع مع أخوانه مداقشهـا
في ليلـةٍ وبلهـا هتّـان ورشاشـي = وقلايد الوسـم مرخيـتٍ مراهشهـا
ليا أضمرنّ الفحول وجاهن طياشـي = والأرض في بطنها قـرّت هوايشهـا
وراع الولع عقب موته له تنعواشـي = طيره على الكـفّ والدنيـا مطنّشهـا
ماعاد يطري له ألاّ بـرق الأرياشـي = اللي على شانهـا البيـداء يفتشهـا
وأنا معي عاريٍ ماهـوب بخياشـي = لاتلّ سيره علـى المقفـي تفرّشهـا
عديم وأسمه عديمٍ ما أسمه شلاشـي = زرق الشوش لالحقها علّق شوشهـا
ومن لا عرف لذّة المقناص ماعاشي = ولعه بليّـا طماعـه ميـر عايشهـا
يسلى بها الخاطر ليا ضاق وانداشـي = وترتاح بالنوم عيني يـوم أغلمشهـا
ماتسمع اذني صدى لجلاج وهواشـي = ألاّ السواري مـع الظلمـا تخترشهـا
يالايمـي خلّنـي بصـدّ وانحـاشـي = عن شوف ناسٍ ماغير تلوّي خششها
والله إن يبطي مع المقناص مطراشي = لين المنيّـه نقابـل وجـه طارشهـا
هذا الدواء اللي يداوي حدبٍ هشاشـي = من هاجسٍ لاتحرّك قـام يجرشهـا





شعر : خالـد بن مدعـث الدوسـري


تقــــــــــبلوا تـــــــــــــــــحـــــــــــــــــــــــياتـــــ ـــــــــــــــــــي

أبن مفلح البدراني
27-12-2006, 02:39 AM
صح الله لسان الشاعر

خالد

قصيده جزله الله يعطيه العافيه


الغالي
بعيد المراميس
مشكور على النقل الطيب
وننتظر من جديدك

فزاع البدراني
27-12-2006, 04:48 AM
الأخ العزيز / بعيد المراميس

تسلم يمينك على القصيده الجزله
والرائعه وصح لسان شاعرها
إبن مدعث الدوسري

تم تنسيق القصيده بعد إذنك
تحياتي
0
0
0

بعيد المراميس
27-12-2006, 11:39 AM
الاخوان ابن مفلح ، فزاع ، مشكورين على المرور ، والردود الجميله ، وكل عام وانتم بالف خير

الأخ فزاع انت تمون


تقبلوا تحياتي ودمتم بخير

تركي الزايد
28-12-2006, 07:55 PM
الغالي/ بعيد المراميس
تسلم يمينك على النقل
وصح لسان ابن مدعث الدوسري

عادل البدراني
03-01-2007, 05:59 PM
الاخ
بعيد المراميس
لاهنت على النقل الرائع

قصيدة جزله وختيار موفق

صح لسان شاعرها


مايسهجه غير جيبٍ يطـرب الماشـي= مع واعر الأرض وألاّ مـع مفارشهـا
جيبٍ يبعّـد عـن مْعشّـاي مغباشـي= اللي يقـصّ الـدروب ليـا تناوشهـا
ماتسمع من المكينـه غيـر وشواشـي= ماكنّـه ألاّ الحيايـا فـي توشوشـهـا
لا فرّ من دوس رجلي صابه خراشـي= فـرّة قطـاةٍ دويّ الملـح خارشـهـا
يطيش من طيش سوّاقـه ليـا طاشـي =نوبٍ يخم الخطـوط ونـوب يقرشهـا

بعيد المراميس
06-01-2007, 11:56 AM
الاخوان تركي الزايد ، عادل البدراني ، شكراً على المرور وعلى الردود الجميله


تقبلوا تحياتي

الحر النداوي
11-09-2007, 11:54 AM
الغالي/ بعيد المراميس
تسلم يمينك على النقل
وصح لسان ابن مدعث الدوسري

احمد بن حزام البدراني
12-09-2007, 11:43 PM
ومن لا عرف لذّة المقناص ماعاشـي=ولعـه بليّـا طماعـه ميـر عايشهـا
يسلى بها الخاطر ليا ضـاق وانداشـي=وترتاح بالنوم عينـي يـوم أغلمشهـا

الاخ
بعيد المراميس
يعطيك العافية
قصيدة جزله
وصح اللسان قايلها
وصح اللسان ناقلها

وتقبل تحيااااااااااتي

بعيد المراميس
16-09-2007, 01:38 PM
البناخي الحر النداوي ،، المتميز احمد بن حزام البدراني شرفني مروركم العطر وردودكم الجميله @وكل عام وانتم بخير @ وتــــــــقبلوا اصدق التحايا