المساعد الشخصي الرقمي

مشاهدة النسخة كاملة : قصيده لــ محمد مريبد العازمي ..!


مشعل بن شنوت
03-05-2007, 12:33 AM
العمر فرصه والحياه ايام والدنيا ظروف =والمشتبه بالامر ما بين الحرام من الحلال


الشعر ديوان العرب وانا بشعري فيلسوف= اترك اهزال الشعر وانقى من معانيه الجلال


البارحه صدرالجنوب يضيق واشوف الحسوف =وين انت يا صدرالشمال احتجت للفزعه تعال

وردت مجاهيم الليال احيام ورياحي شعوف = من يوم وقفني بدرب العشق يسالني سؤال


واقوله بيني وبينه يا عسا الحب مخلوف = ان مارجع ربحه علي والله لا ارده راس مال


كم لي وانا تكويني الدنيا على روس الكتوف = واشيل ما لا اطيق من شانك واحملها الجبال

ومديت لك ريحانة الاشواق في بيض الكفوف = قبل يجف العطر والاشواق تدفنها الرمال

وقفتني في الشارع الضيّق وممنوع الوقوف = مسار واحد والمصيبه لا يمين ولا شمال

تقول طوّفها معي واقول عيت لا تطوف = اجيبها منا تجي منا و لا فيها مجال

والحب ما ينفع معه فزعه ولا واو معطوف = والحب لو زالت جبال الارض ذكره لا يزال

يرقا على رجم الغرام ويصدمه نبض الحروف= اشوي من نسج الغلا واشوي من نسج الخيال

وش عاد لو غنيت طاروقك وصفيت الصفوف = صفٍ يبا ياقف معي وصفٍ اليا من رحت شال

والله لتبطي ما وصلت ادنى مواصيل الهنوف = الجادل اللي دمعها لارحت والا جيت سال

الجادل اللي طيفها عندي ولا كل الطيوف = ام الحلا ام الغلا ام الدلع ام الدلال

اللي هداياها ملت كل الزوايا والرفوف = يطلع ابطلتها بدر ويغيب لا غابت هلال

وانا اقدرها مثل تقدير حاتم للضيوف = واطرب على فيّة غلاها كل ما مال الظلال

اعيشها عيشة عمر مابين امن وبين خوف = ازرع لها شعري وهي تسقيه من غيث الوصال

حتى خذتني عشق وانا اخذتها رغم الانوف = واسكنتها روحٍ عن اهروج البشر منفى اعتقال

والا انت قربك ما يشجعني وفرقاك امعروف = اقلط على نزف الشعر والفال يقفاه العقال

حتى لو انت الذ من تمر المدينه والهفوف = ارحل ترى ايامك خضر لكن ترى اسنينك اهزال

وفر ادموعك دام دمعك مر والدرب امحفوف= جعلك فدا من هلت ادموعه علشان ابتهال

عبدالله بن سدحان البدراني
04-05-2007, 02:28 AM
مشعل بن شنوت

اختيار موفق ..
العازمي شاعر له اسلوبه
بصراحه عندما اقرأ قصائده
لااحس بالملل ..

يعطيك العافية

تحياتي

خوي النشاما
08-05-2007, 12:51 PM
الأخ مشعل مشاركة تشكر عليها ولا تحرمنا من مثل هذه المشاركات
حيث أنها تطرب الكثير من متذوقي الشعر

ابن شنوت
08-05-2007, 05:49 PM
اختيار جميل ويعطيك العافيه
وننتظر منك المزيد من الابداع
وتقبل تحياتي...

السيسبان
08-05-2007, 07:29 PM
الصديق الرائع

مشعل بن شنوت

مشكور على الانتقاء الذي يدل على علو ذائقتك

صح لسان الشاعر


وسلمت يمناك

ابوتركي
08-05-2007, 08:31 PM
الاخ العزيز/ مشعل ابن شنوت


دئمآ مبدع في مشا ركتك ومحمد مريبد من الشعراء المبدعين


مــــــشــــكـــــو رررررررر


تـــــحــــ ابوتركي ـــــا تــــي

ماجد ابن راجح
09-05-2007, 04:15 PM
الاخ/ مشعل


نشكرك على القصيده الجزله


والنقل الافضل


لـــ صادق الود ــــك