بيت الشعر

[الزعيم]

بيت الشعر عنك مانويت بالتوبه
ولا نويت ابتعد عن حمر الاطعاسي
*** ** ***
استهوي الضو بوجه البيت مشبوبه
واستهوي البن يحمس وسط محماسي
*** ** ***
واشفق لشوف الغضى يبسٍ ومحطوبه
وشوف الدلال الصفر يبري تعوماسي
*** ** ***
وافرح بقرمٍ يكر النار في ثوبه
وريحت غضاها يرد الروح لأنفاسي
*** ** ***
واسعد بشوف الحلال وحزة غروبه
ايلا ضوت للعشا تقرع بالاجراسي
*** ** ***
والبل تبغى العشا ترطي ومشعوبه
والراعي اللي مع الحيران محتاسي
*** ** ***
يازين شوفة نجوم الليل مصحوبه
مع بدرها اللي ينور اجمل اعماسي
*** ** ***
ينعش فؤادي نسيم البر وهبوبه
وريح الخزامى ايلا هبت بنسناسي
*** ** ***
والمهرة اللي عسفها العود باسلوبه
من دون سرجٍ ركبها عالي الساسي
*** ** ***
شيهانةٍ للقنص تطلع ومطلوبة
تطلع بعيد وغلاها ماله قياسي
*** ** ***
بنت البدو شيخةٍ فطنه ورعبوبه
تعوذ من كل شيطانٍ وخناسي
*** ** ***
ايلا لفى الضيف مثل البرق لهلوبه
سيفٍ تصاقل بملعب كل الاجناسي
*** ** ***
ماعمرها جات مخزومه ومغلوبه
غندورةٍ والعقل انفوذه سياسي
*** ** ***
مرغوبةٍ حيل اي والله مرغوبه
من مجلسٍ للنشامى فيه جلاسي
*** ** ***
يانار اكلي حطب ماعندنا توبه
حنا البدو دايم نمسي بالاطعاسي

[ابن سعران]

الغالي الزعيم

السلام عليكم ورحمة الله وبركاته:

ينعش فؤادي نسيم البر وهبوبه
وريح الخزامى ايلا هبت بنسناسي
*** ** ***
والمهرة اللي عسفها العود باسلوبه
من دون سرجٍ ركبها عالي الساسي
*** ** ***
شيهانةٍ للقنص تطلع ومطلوبة
تطلع بعيد وغلاها ماله قياسي

هيضت المشاعر ولاسيما والشتاء على الابواب والبر يزين بعين البدوي

((يابجـاد شـب النـار وادن الدلالـي ===واحمس لنا يابجاد ما يقعـد الـراس

ودقـه بنجـرٍ يـاظريـف العيالـــي ===يجذب لنا ربعٍ على اكـوار جـلاس))



تقبل صادق الود

[الزعيم]

الغالي ابن سعران

البر زين في عين البدوي دايم ، بس في الشتاء له طعم خاص ..

تشرفت بمرورك..

[star albdarain]

يالعين مانتي على المرقاد مغصوبه ================== لوطار عنك الكرى يالعين لاباسي


هيض شجوني زعيم الشعر مندوبه =================== اثره على اسمه زعيم ويبعد ارماسي


نجم البدارين

[عادل البدراني]

أخــــــي

الزعيـــــــــم

الله يعطيك العافيه

لاعدمناك



استهوي الضو بوجه البيت مشبوبه
واستهوي البن يحمس وسط محماسي
*** ** ***
واشفق لشوف الغضى يبسٍ ومحطوبه
وشوف الدلال الصفر يبري تعوماسي
*** ** ***
وافرح بقرمٍ يكر النار في ثوبه
وريحت غضاها يرد الروح لأنفاسي

[الزعيم]

الغالي نجم البدارين

لاهنت ياراس الرجاجيل..

وصح لسانك..

تشرفت بمرورك..

[الزعيم]

الغالي عادل البدراني

وياك ياابيض الوجه..

تشرفت بمرورك..

[عبدالعزيز البدراني]

يامرحبا باللي كتب باعذب اسلوبه <> فبيت الشعر حب وقدر ونوماسي

ترحيبتن تجلا عن المهموم ماصابه <> مع دلة صفراء ومركى ومجلاسي

[ساري]

الاخ الرائع الزعيم

السلام عليكم ورحمة الله وبركاته

هيضت المشاعر بها القصيده وخصوصا بالوقت الحالي

مع الشتاء واخبار المطر في نجد العذيه واقولك خلك

جاهز للمكاشيت لان السنه هذه بيجي ربيع طيب بمشيئة

الله وتزين الكشتات

تقبل خالص الود