قصيدة وصف للابل المجاهيم

[راعي الديره]

هذه القصيدة في وصف الإبل المجاهيم






يوم كلـن قـال ودي فالزمـان وودي

والتمني في كثير احيان مالـه خانـه

قلت ودي مجهمٍ يوم الوصوف تعـدي

وصفها ماكل شاعر ترجمـه بلسانـه

ظافية برطم عريضة لحي زينة خَـدي

خشمها نابٍ شـوي وكنهـا زعلانـه

واذنها ذيبٍ على رجمٍ طويـل معـدي

ورقبتها من مجاميع اللحـم عريانـه

كن بين عضودها شلفاً حديدة حـدي

بـارزٍ نسنوسهـا ومتونهـا مليانـه

فخذها بابٍ من الحجم العريض مصدي

لونهااسود والصفار مداخـلٍ فالوانـه

جنبها جزلٍ عريـضٍ بـارزٍ ممـدي

كنهـا بيبـان جيـبٍ شلحـو بيبانـه

اهزعٍ عرقوبها عنه النظـر ماصـدي

ماتوفيها حقوق الزيـن كلمـة زانـه

ذيلها يقصر عن العرقوب شبر بيـدي

مبدعٍ فـي خلقهـا خلاقهـا سبحانـه

شوفها تمشي ورى الراعي يبيح سدي

كنها عنتـر ليامنـه نطـح عدوانـه

وشوفها فمراحها قبل الرحال تشـدي

بيت بدوٍ طارحين اثنين من عمدانـه

لو تكلم كان قالت مابه احـدن قـدي

شايله كل الشموخ ورافعـه منشانـه





للشاعر الكبير / حزام العصيمي

أتمنى أن تحوز على رضاكم
اخوكم الطيير

[الحرير]

مشكور على النقل الرائع يا خوي

[محمد بن مرزوق البدراني]

الاخ راعي الديره صح لسانك ولسان الشاعر

حزام العصيمي


تحياااتيـ

[ابوفيصل البدراني]

قلت ودي مجهمٍ يوم الوصوف تعـدي

وصفها ماكل شاعر ترجمـه بلسانـه

راعي الديرة تسلم يمينك على النقل

فالابل تتميز بصفات جميلة تنفرد بها عن بقية الخلق وقد امرنا الله عز وجل أن ننظر اليها ونتدبر فقال ( افلا ينظرون الى الابل كيف خلقت)

لك ودي