سلام الله سلام

[فهد نفيع البدراني]

سلام الله سلام وينبني بيت ٍ على سيسان==عليه القافية والوزن ومجوّد من أطنابه
أبا شاعر يجيب من البحر اللول والمرجـــان ==ليامن مر بين الناس تشر له بسبابــة

[عبدالمطلوب مبارك البدراني]

هلا مرحبا ترحيبةٍ تروي العطشـان
==== ابن عم وابن رجـــال يا حي هالـــــلابه
ترانا لنا ميقاف تشهد به العربـــــــان
====على العز واهل الطيب والطيب نشقابه

[فهد نفيع البدراني]

اشوف الموج يلطم يارفيقي والبحر خوّان
=وكلن شد حيله فالحياه ويشعب اركابـه.
أنا لية ثمان سنين داخل ساحـة الميــدان
=بغيت النقل من بدري وعيّا الحظ ماجابه

[عبدالمطلوب مبارك البدراني]

صحيح الموج يلطم والسفينه مالها ربان = ليا كـــثروا ربابين السفينه راحت نهابــه
سألت الوالي المعبود يفرجها عظيم الشان= عظيم كل خلقه تسأله ماخاب طلابه

[تركي الزايد]

صحيح المـوج يلطـم والسفينـه مالهـا ربـان ++لـيـا كـثـروا ربابـيـن السفيـنـه راحــت نـهـابـه

صحت السنتكم

متااااابع

ومع صف ابو ناصر ...

[فهد نفيع البدراني]

خلووووووووها : اللحن ياتركي!
تزهب يابو ناصر واضبط الحبة على النيشان
أنا اصيب الهدف وانته تصيب ورمي متشابه .
يقولون الفرح بكرة يجـي بس الفــرح مابــان
وكلن مشرف ٍ في راس ضلعه فوق مرقابه .

[عبدالمطلوب مبارك البدراني]

خلوووها الصفوووف يا تركي !!!



توكلنا على الله يابن عمي خالق الانسان = تراه السيف يبتع في يدين مجود نصابه
تبا تفرح بإذن رب كريم مكون الاكوان = وكلٍ ماشي بدربه وكلٍ حاسب حسابه

[فهد نفيع البدراني]

مشينا فالطريق اللي يبى واحد وسيع ابطان
ليا جات المواقف يستخير ويمسك أعصابه
عسى من طب سوق الحظ غير حظه التعبان
لقاله ناس تشري ولاّ كل النــاس جلابـــه

[تركي الزايد]

عسى من طب سوق الحظ غير حظه التعبان
لقاله ناس تشري ولاّ كل النــاس جلابـــه


سرى الليل وينك يابو ناصر...

[عبدالمطلوب مبارك البدراني]

خلووووها ومعذرة يا ابن العم
على التأخير كنت مسافر في اليوم الماضي






ترى كل الاوادم تحت دبرة ربنا الرحمان = يسيرهم على كيقه ما يخسر من نصى بابه
وحظ الادمي مقرون به والعلم له برهان = عليك انته تحاول والقدر ما عنه مجنابه

[خالد]

صح السنتكم


مبدعين

[فهد نفيع البدراني]

ليا شفت البلد فاضي وقلّت زحمة السكان
ابيك اتروح للغابـة وتنشد سيّـد الغابــة .


ابيك تقول له وش صار بعد اوامر السلطان
اعرف الصقر له صولات والقوة بمخلابه.

[عبدالمطلوب مبارك البدراني]

اليا شفت البدو شدو وقفوا واخلوا المقطان
= ====كبير القوم ما يقدر يرجعهم بمشعابه
انا ليش انشد العـــــربان وانا عارف العنوان
= ===اليا طاح المطر والسيل كلٍ يخبر اصحابه

[فهد نفيع البدراني]

ليا من شدوا البدوان مانقعـد وراء البـدوان
ندوّر للربيع اللي كسا الديرة من أعشابه.





ومن ينشد يجيب العلم مايسند سمعها فلان
تضيـع الـسالفة مابين سمّاعـة وكتّـابـة .

[عبدالمطلوب مبارك البدراني]

الا ما اكثر علوم البدو ذا ريّض وذا عجلان = ترى كثر الطواري يا فهد ما تكسب كسابه
ليامنك سمعت العلم لا تتكل على النشدان =على العنوان تدخل ثم شوف العلم تدرابه

[فهد نفيع البدراني]

ابو ناصر : صح لسانك ويعطيك العافية
استمتعنا بهذه المحاورة
وترى مالي خبرة بالمحاورة قد تكون هذه
المحاولة الثانية أو الثالثة
والمعذرة إذا كان هناك أخطاء ،منك نستفيد ونتعلم
ومن الشعراء الموجودين كذلك ..شكراً لك
ولك التقدير والاحترام.

[عبدالمطلوب مبارك البدراني]

يعطيك العافية ابن العم الغالي فهد نفيع البدراني
سعدت جداً بهذه المحاورة الرائعة و الممتعة حقاً
وما اقول الا ما فيك حيله و ما بدا منك قصور ابداً
سعداء بتواجدك بيننا تفيد وتستفيد ...
لك فائق التحية والتقدير والاحترام

[محمد بن جعيثن]

الاخوان الاعزاء
فهد
وابو ناصر
ابداع فى ابداع وفعلا هناك رقي ورقه فى هذا الطرح

لكم جزيل الشكر

[عبدالمطلوب مبارك البدراني]

ابو عبد الله

سعدت جدا بمرورك هنا

لك فائق احترامي