المساعد الشخصي الرقمي

مشاهدة النسخة كاملة : غالب سعود الظاهري


محمد بن جعيثن
10-12-2006, 10:36 AM
بسم الله الرحمن الرحيم
السلام عليكم ورحمة الله وبركاته


الاخوان الاعزاء
احببت ان اعرض بعض قصائد لشاعر من حرب هو الشاعر الخلوق
الاستاذ/غالب سعود الظاهري
http://www.up.4yas.ws/images2/66816khalb.jpg

رساله للاجيال


كيف الوناسه كيفها .. دام الاحوال= وصلت الى الأسوا وكثر التحايل
ما والله القلب يتطمّن ويختال= وهو يشوف الوضع مايل ومايل
الا عقب يكتب رساله للاجيال = قبل ما تكثر بالزمان الهزايل
تكفى كلامي وصله كل رجال= واللي يسوّن بالرجال الجمايل
قل قال ابو قلب التعب قل لهم قال= كل من عليها ربنا قال زايل
الى متى ما نوحّد صفوف يا عيال= ضد المهازل كلها والرذايل
نبي نشوف رجال في سن الاطفال= ونبي تغيب انذال بين العوايل
وأن قالوا المعادله هاذي اهبال = يالله تعجل بالعوض والبدايل
مدامها صارت مساحه للانذال !! = واللي نبيهم في زمنا قلايل !!
قم ياطويل العمر ووقف على جبال = خل الندا .. يسمع بجده وحايل
من حقي أتبرى من اللي على البال= واقول للي طيبهم ما تمايل
كل من تحل المعرفه معه بالحال= لا يعتبرها الا على راس طايل
( فقير ) والا اللي ( قدر يجمع المال ) = الفرق عندي بختلاف الخصايل
ما هو خضوع ٍ للمصالح والاعمال = والا .. نفاقك .. يا لنفوس الذلايل
حلمي وعرّفه معتلي فوق لازال = دايم عيوني صوب حلمي اتخايل
احلم ما ادخل مجلس الا به رجال = افضل رجال بكل ذيك القبايل
ماهوب شرط أنه ولد عم ٍ وخال = أنا ( ولد عمي ) (حميد الفعايل)
مثل الذي به زينوا ضرب الامثال = طيبه يعدّد في جميع الوسايل
كل الرجال لحال والصاحب لحال = حاسب حسابه من حساب الأوايل
في نظري والا ترى مثله ابطال = لو اكتب اسماهم تضيق الرسايل
اغلبهم ما شفته وله قدر واجلال= يا كثر والله طيبين السلايل
جابتهم السمعه لنا عقب الافعال= اللي تعلت وامتلت بالفضايل
ما علت اسماهم بطاقات الاحوال = والا .. الأعلام اللي يجيب الهوايل
والا .. رقم لوحه مميز وجوال = تميزوا في غير رقم الموبايل
لهم احترام وقلبي اليوم ما شال= الا الذي له مخلص القلب شايل






ثم الابداع عند خبر مزاين ابل قبيله حرب


نغمة الجوال صوبه نبهتني = يوم دق ودقته دقه خفيفه
شاشته بسم المكلم عرفتني = اسم تفخر يوم للأسماء تضيفه
قمت أرحب والمشاعر طيرتني = كن راسي مرتفع فوق المنيفه
قال ياغالب ما جتك علوم جتني = قلت خير وجعلها علوم ٍ طريفه
قال به رجل ٍ فعوله معجبتني = ما هو من شانه تعلا بالوظيفه
رتبته لو ثبتوها فوق متني = يا طويل العمر وعزومي ضعيفه
كان حرب اهل الحرايب حاربتني = وسمعتي مضروبة ٍ باول قذيفه
قلت خل أمثالك اللي ما خفتني = هات علمك خل فكري يستضيفه
قال فيه اخبار حلوه فرحتني = عن مزاين حرب للأبل الكليفه
توها من مجلس رجال وصلتني = واللواء ابن دليم له وقفه شريفه
قال تنظيمه عليه واعجبتني = وقفته مع وقفة عقول ٍ نظيفه
كلهم والنعم واللي شرفتني = مالها الا النشر في صدر الصحيفه
افتخر واعتز لحظة حركتني = في مديح اهل الوفا تبقى عفيفه
ليتها في ذكر الاسماء عاونتني = والله أن عيونها ماهي كفيفه
بس لو عديت الاسما وقفتني = كل واحد يستحق اني اضيفه
والقريحه بالقصايد واعدتني = كل رجل ٍ طيب اهدي له عسيفه
والظروف المقبلات أن ساعدتني = لجعل الديوان الاول يا خليفه
عن قبيلة حرب..حر ب اللي عطتني= شي غالي حيل ما يلقى وصيفه
كرمتكم يا حروب وكرمتني = جعل تفداها حياتي والوظيفه



ثم التصوير الرائع وحفظ الارث والقصه على هيئه قصيده مصور
وقد اعجبت بها كثيرا



ياربعنا قصة دخيل البلالي = ما مثلها قصة ولا مثلها صار

هذا دخيل بليله من الليالي = نوى يحنّشل مثل ماكان يختار
وله جارة ٍ ما جابت من العيالي =الا ولد وأصله من مطير الاخيار
قال الولد يا يمه أن كنت غالي= لي اسمحي بروح مع واف الاشبار
ابي اتعلم منه شي ٍ طرالي =ماني صغير وصرت كني على نار
قالت مدامك مع كريم السبالي = ابوصي الحربي مدامه لنا جار
وتخاووا الأثنين صوب الشمالي= يبون كسب اللي يشدًن الانظار

وطاحوا بيد حاكم يحكم الرجالي =ما يعطي اللي ينهب ويسلب انذار
قال اقطعوا لي روسهم بالتوالي= خلوهم عبره لو تجي حرب الاخبار

قال البلالي تكفى .. تكفى ياوالي =اكسب اجر باللي ورا ذيك الاقطار
واسمح لواحد كان فيها مجالي= اللي ورانا مالها كبار وصغار
عجوز ترجي من عزيز الجلالي= يردنا وأنته بهالحكم جبار
قال ايكم قرَب عليه الزوالي =في راسك او راس الولد عجل اختار
قال البلالي خله يسلم بدالي =اذبحني وخل ولدي ذبحته عار
ويوم اقطعوا راس الوفا والمعالي= استغربوا كيف الولد كيف ما انهار
قالوا ابوك وقال ياهملالي =هذا من عيال وسدة حرب الاحرار

وأنا مطيري ماهو عمي وخالي= حفظ وصاة امي وهذا الذي صار
وصاحوا بصوت ٍ هز ذيك الجبالي= كل الرجال اللي هكاليوم حضار
وابن رشيد يقول ليته حكالي = والله ليسلم مير ذا حكم الاقدار
يازينها قصة دخيل البلالي= ما مثلها قصه ولا مثلها صار

وفى مدح من يستاهل الشيخ عليان الطهيمى عند فوزه فى ام رقيبه
يتجلى الابداع والتصوير والابتهاج بالفوز


له الله قصيد ٍ ما يجي بـالـفـخـر مـلـيـان=يضيف لرصيدك كـنـز دايـم تـمـاريــبـه
مصيره أكـيـد أنــه الـى عـالــم الـنسـيان= وش الـدافـع الـلـي يجعل الشاعر يجـيبه
وأنا اللي جعلني فيه اغني وأنا طــربـان=واخـلـي هجوسي للـمجــرات تسـريـبــه
كـتبته وأنا اقول أرفـعـه فوق يـاعـلـيـان=اذا جاد مـن طـيـبـك يـقـولـون يـاطـيـبه
اكــيــد المعاني ما تجــي بالقصيد اسمان=اذا مــا لـقـت رجــّــال مـثـلـك تـغـنــي به
عسى الله يبارك في هكالــلابـه الشجعان=لنا جـابـوا اللي جـــعـل الأيام تـبـطـي به
هــم اولاد راشد يـنـتـسب منهم الطهمان=ولـدهـم عـلى خصمه يجـي دايـم مصيبه
اقــوله يا خصم اللي بهن يردي الأنسان=اذا مــر ذكــر اهــل الـردى قيل والخـيبه
واذا مــر طــاري مثل شرواك يا بليهان=يروحون بعض شيوخ الأموال في غيبه
ترى الفوز ماهو بس لافـاز لــك حيوان= رح انشد ابـو فـواز كم راح من جـيـبـه
صرفهن على مخيّم بـه يـقـلـّط الضيفان=جميع القبايل فـعـله الــزيــن تـدريــبـــه
مخيّم قبيلة حـرب .. ما مثله أي أن كان=ينوّمس مــدام أن الـطـهـيـمـي يهـلي به
فـي الـمـربـعـانـيـه لـيـا جـيـت له بردان= تحس الــدفا الـلـي من حرارة تراحـيـبه
وتـزيــد الـونـاسـه لا تفـرجـت بـالاعيان=عـلـى الـلي عـلـيـهن نيهن تقـل تـركـيبه
فـجوج النحور اللي تحتهن تـقـل بـيــبان=تذكـّرك نـظـرتـهـن فـي الـعـز والـهـيـبـه
مكـرمهـن اللـي يكـرم الضيف والجيران=ما يلحق حبـيـباته وهو حـولـهـن سيـبـه
يا وضح ٍ خذن قلبي وقلب الف من قحطان =لا والله زيــاده .. وانشدوا حـرب وعتيبه
ما قالوا مطير اسمع يقـولـونه السبعان=وكـلـن يقــول المـركز الــزيـن تـرتـيـبـه
ما شـفـتـي يـا أم رقيّـبه الصبح حزة بان =طـوال الـرقــاب يغـطـن اللي لها رقـيـّبـه
لـو تـنـام بـيـن اشعـافهن وأنت بالصمان=تـذّكــر آمـــان المملكه .. خادمة طـيـبـه
عـلـيـهـا وعـلـيـهـن بسمك الله يارحمان= عسى اللي يـهـز آمـانـهن يـلـدغ اجنيـبه
له الله قـصـيدة ٍ مـا يمـجـدك يـا عــلـيـان=نـصـيـحه الى الشاعر يــرده الـى جـيـبـه



شكرا للمبدع الشاعر // عالب سعود الظاهري

ابن عضيب
10-12-2006, 01:10 PM
سلمت يداك ياأبا عبدالله

على هذا الموضوع الرائع


أما بالنسبة للشاعر غالب الظاهري


فهو شاعر ورجل سمعت عنه الكثير من المواقف الرجولية


وأذكر بيت للشاعر الجميل ناحي الحربي (صادق الود) يقول فيه:


غالب معاني ماحوتها قصيدة=ان قال شاعر وان تردا ولاقال

وهي قصيدة طويلة في صديقه غالب لكني لا أحفظ منها إلا هذا البيت


وبهذه المناسبة أضيف هذه القصيدة الرائعة كروعة صاحبها غالب

والشامخة كشموخ سعيد الذكري (مجوز العزبان) أحد أشهر فرسان قبيلة حرب


يامطيّب ( مجوز العزبان )
شيـخٍ غـزا بالعزوبـيـه

من شان كلن يجي كسبان
ويفوز فـي بنـت حربيـه

والبيض لا شافن الفرسان
كلـن تقـول البطـل ليـه

يدفع مهرها من الميـدان
معـاركٍ دايــمٍ حـيـه

ما احد سبق فارس العوفان
أخذ لقب مـا ذكـر زيـه

( سعيّد الذكري ) اللي كان
قائد بطـل صـادق النيـه

ماجاه هذا اللقـب مجـان
تشهد قبايـل علـى ذيـه

شجاعته خلـت الشجعـان
بـه يعتـزون السنافـيـه

واليوم يامجـوز العزبـان
مليون عانـس سعوديـه

ابن عضيب
10-12-2006, 01:31 PM
عفواً على سقوط القصيدة في المشاركة السابقة




يامطيّب ( مجوز العزبان ) =شيـخٍ غـزا بالعزوبـيـه

من شان كلن يجي كسبان =ويفوز فـي بنـت حربيـه

والبيض لا شافن الفرسان =كلـن تقـول البطـل ليـه

يدفع مهرها من الميـدان =معـاركٍ دايــمٍ حـيـه

ما احد سبق فارس العوفان =أخذ لقب مـا ذكـر زيـه

( سعيّد الذكري ) اللي كان =قائد بطـل صـادق النيـه

ماجاه هذا اللقـب مجـان =تشهد قبايـل علـى ذيـه

شجاعته خلـت الشجعـان =بـه يعتـزون السنافـيـه

واليوم يامجـوز العزبـان =مليون عانـس سعوديـه

محمد عبدالمحسن البدراني
10-12-2006, 04:55 PM
ونعم ونعم والله بغالب وصح لسانه

شاعر مرموق ومهندس للكلمه الشعريه تشوقني ابياته واطرب لها
يجيد الغزل والمدح والوصف وجميع اغراض الشعر..........

وبغض المظر عن شعره وجدته رجل خلوق يتصف بصفات الرجوله وبمتله تفتخر وتعتز حرب


عرفته عن قرب ووجدت به ماكنت اسمع عنه من كلام طيب وثناء


وماقصرت ابو عبدالله

الف الف شكر لك على هذه الاضافه الجميله


بيض الله وجهك

عادل البدراني
10-12-2006, 06:21 PM
لاهنت وبيض الله وجهك

يا ابوعبدالله

الله يعطيك العافيه

على النقل المميز والاختيار


وصــح لسان الشاعــر

غالب سعود الظاهــري

ابوفيصل
25-03-2007, 01:44 AM
الشكر موصول للشاعر / غالب الظاهري وصح لسانه


على القصايد الجزيله كجزالته


سلمت يداك يابو عبد الله على النقل0

صالح الربيع
30-03-2007, 12:48 AM
بارك الله فيك اخوي ابو عبدالله

شاعر رائع وجميل وصح لسانه على هالقصائد الجزله التي لاتأتي الا من شاعر

ابن شنوت
22-04-2007, 10:21 PM
ماقصرت ابو عبدالله على القصائد
وغالب الظاهري شاعر مشهود له
بالجزاله ويستاهل
وتقبل تحياتي..