بسم الله الرحمن الرحيم

مساكم الله بالخيرات..
مساكم الله بكسرة عود تدخن فوق الجميرات..
مساكم الله بريحة السميرات<<<يعني السَمَر
مساكم الله بريحة الخزامى والنفل..
<<<خلاص يكفي ابداع

مالكم بالطويله المهم منذ زمان ونفسي اوطوط في موضوع واكتب عن المطبخ بس ماش الوضع يخوف مالها داعي بكره تطلع صورتي

عاد وانا قاعد جنب ,واحد من الشباب
قعدنا نتطرق الى مواضيع القهوه وما القهوه

وخويي بهاللحظه خرمان قهوه .. زي ما تقول قم يابوالشباب وسو لي فنجان

وانا اللي اهب زي الريح .. << شبيهـ الريح ما يحتاج

واحضر متطلبات القهوهـ ...

وعلى فكره القهوه العربيه فنننننننن وفن صعب بعد..

في البدايه لازم نذكر انواع القهوه الجيده ومكونات القهوه:

*اجود انواع القهوه هو البريه والهرري والخولانيه..
ومتوفره بالسوق..
ا*لهيل والفاخر منه يبين بالريحه وحجم الحبه..طبعا الغالي سعره فيه..
*يضاف في مرات القرنفل(المسمار)
البعض يضيف الزنجبيل مع القهوه(مع الهيل .. روووعه الطعم معه)

*اخر حركه شفتها مع احد الشباب وهو يحط حليب ابو قوس قبل ما يزل القهوه في دلة التقديم"والسبب هو عشان تخفف الحموضه!!".. <<< بس ما انصحكم بهالحركه ..

<<< احب قهوتي كما الاتي .. وهي قهوه وهيل وقرنفل .. بس

وانا من الناس اللي ما يطيق الزعفران على القهوه ..

ادواتي .. <<< بدائيهـ جدن . .. لان ابو الشباب خرمان قهوه .. لا وعلى الطريقه القديمه

يعني بيعلمني شلون احافظ على تراث اجدادنا .. طيب فيه مطحنه يابو فيصل .. الا نحمس القهوه على النار

*المحماس: وفيها نحمس او نحمص البن..

*النجر أو المهباش"عند اهل الشمال" : ويستخدم لطحن القهوة والهيل والقرنفل•

عاد صوت النجر يقعد يلعلع باذنك اربع ساعات بالقليل

*دلة التفويح: تطبخ بها القهوة•

*دلة التبهير والتقديم: وفيها نبهر القهوه ونزلها قبل التقديم

*الليف:هو الذي يحجب الهيل من النزول في الفنجان عند تقديمه

بسم الله نبداء بالاعداد
اللي محشور قدام شيبان .. وامام اختبار الحفاظ على العادات والتقاليد

هلما بنا نحو تحضير القهوهـ ..

اولا .. تحمس / ين القهوهـ .. بشئ يسمى محماس .. اذا لما يتم التعرف عليه انا اقولكم شلون تعرفونه

تحصلون شكله .. يشبه المنجنيق .. اللي كانوا يستخدمونه بحروب الروم .. ولكنه بدون نابض

واحيانا تحصلون له كفرتين .. << هذولا اللي من جد يوميا يسوي قهوه

وتقعد تحمس القهوه الين تصير شقرا

وعند حمسك للقهوه .. لا تتركها بدون تحريك لان ذالك يسبب احتراق جزء من حبات الفهوه

مما يخرب مزاجك ..


بعدين جب لك نجر وكمخ في القهوه الين تصير شبه ناعمه الى شبه خشنه

عاد تكون قبل كذا حاط بريق المفواح على النار .. لاجل تستخدم الماء المغلي

في صنع القهوهـ ..

بعد ما يفوح الماء .. صل 2 لتر من الماء في مفواح القهوهـ .. بعد وضع فناجنين

قهوهـ ..


رجع القهوهـ .. على النار ..



وفي هذه اللحظات .. حط لك كم حبت هيل مع 5 حبات قرنفل

بالنجر .. واكفخ بهن .. الين تحس انا خوياك .. استانسوا ,, << هم مايستانسون الا

على حاجتين .. تدرون وش هن .. صوت النجر .. وتعشيقة الريوس بالشاص

وبعد تنعيم الهيل والقرنفل .. حط مابالنجر في الدله .. وبعد ان طبخة القهوهـ

على النار .. الين داخة .. صل القهوه بالدلهـ




ولا تنسى الليف .. لاجل يحشر الهيل بالدله .. وحفاظا على فراش المشب .. من حبات الهيل

التي سوف تتطاير من افواهـ .. الربع اللي تقهويهم

ولا تنسى تحط مع القهوه شقى ,, ابائك واجدادك ..... التمر




وهذي قعدهــ على القهوهـ ,,



وهذا ماكان بجعبتي لهذا اليووم ,,

وترقبوووا قريباً....


طريقة سوات الشاهي المحكور ...

وبصحه وعافيه ..

وانشالله .. تكون حازة الطريقه على رضاكم واستحسانكم

وعندي ملحوظه ... تروا الهيل مع القهوه يقلل من مفعول الكافيين بالقهوه مما يخفف من حدة الام القلب

وخطر الاصابه بامراض الشرايين

وتيك كير لكم

وتشااااااااااو

الاخ الشيف العزيز

أبو نايف

مشكور على الابداع في الشرح

وان شاء الله ابطبق الطريقه بحذافيرها

وبعد ما اجرب ارد عليك

اقول وش رايك تجي تقهوى ونجربها سوا


اعتبرني احد متابعي ماتطبخه في هذا المنتدى

لك خاص الود

يابجاد شب النار وادن الدلالـي =واحمس لنا يابجاد ما يقعد الراس

ويقول احد الشعراء

يقول الامير راكان بن حثلين







لم استغرب مثل هذه المشاركات الرائعه منك وانا انتظر الشاي المحكور

بس تراني احب القهوه والهيل وشوي زعفران واذا جيتك مسير لاتحط عويدي

تقبل صادق الود