(حب البداوة )
ماني من اللي غيرته الحضارة = باقـي عـلى حـب البداوة إلى الحين
بيت الشعر عندي يساوي عمارة =والخيل محلاها ومحلا البعـارين
والبـر مـحـلاه بمسـاه ونـهـاره = ترتاح له نفسي وتفرح به العين
لا ضيّقت صدري هموم وكداره = أرحل على ديرة هـلـي الـبـداوين
ألقى الوناسة عندهم والإثـارة = ريح الخزامى والنفل والرياحـيـن
والصيد لا هدوا عليه الصقارة =مابين وكري وطير حر ٍ وشاهـيـن
أنا بـدوي والـجود أ ول شعاره =والثانية عندي مبـادئ وقـوانين
أحب من يوفي صديقة وجارة= وأحب من يمشي على منهج الدين
ربعي وناسي كلهم في الصدارة =كـل الـعـلـوم الـغانـمـة لـلـبـداريـن
وعندي عليها إثبات ماهي كبارة =أهل العقول الراجحة والموازين
أهل الوفاء والمرجلة والوقاره =ربعي بني بدران في العسر واللين
لا لاح برق الحرب واقدح شرارة =نصمد كما تصمد شموخ الضلاعين
حنـا لـنا البارود فــن ومـهـارة = وتبقى قـبايل حـرب سـم المعادين
النصر من عاداتهم والجسارة =فـرسـان لا حـان الوغى في الميادين
يا كم لنا في الحرب غارة وغارة =تاريـخنـا يشـهـد علينا من سـنـين
وكل القبايل فيها مجد وظفارة = كـل الـقـبـايل فيها ناس ٍ شـجـيعين
ومدح الحمايل عز ماهو خسارة = كـل الـقـبايل عـنـدنـا قـدرهـا زيـن
واختم بيوت الشعر باول عبارة =باقي على حب البداوة إلى الحين
شعر / ضيف الله مناور البدراني (أبووليد)