[عبدالمطلوب مبارك البدراني]

المشاركة الأصلية كتبت بواسطة تركي الزايد

مشاعر ابوية قلتها بعد وفاة والدي رحمه الله رحمة واسعة

الموت للخلق محتوم=حكمة اله السموات
هو امس والا هو اليوم=ماضي ولا فيه فزعات
ودي ولو بالعمر يوم=اعطيه ابويه ولا ابات
ارقب عيونه عن النوم=واقول يالموت هيهات
دور لغيره من القوم=واترك زبون الشكالات
وان كان مرسل وملزوم=روحي فدا للصعيبات
واثري ضعيفن ومهزوم=روح بروحه ولا جات
مرحوم يابوي مرحوم=ياللي فعولك حسينات
للدين في وجهك وسوم=مخلص بكل العباداب
تقوم والناس بالنوم=تطلب كريم العطيات
مصحفك في وسطه ارسوم=ومكملن كل الآيات
والمسجد اركانه اليوم=تنعى كثير الصلوات
والطيب تايه ومهموم= عقب اليدين السخيات
لانك مقره على الدوم=كافله وقت المجاعات
من غير قاصر ولا لوم=لاهل الكرم والحميات
ابوي طيب من قروم=حي ولا هو من اموات
مكلوم تركي ومكلوم=ناسن كثير وبنيات
يارا وهي مالها يوم=تطلبك رب البريات
تنشي سحابن ومركوم=تسقي قبور عزيزات
من بينها قبر معلوم=فوقه نثرنا العبرات
مرحوم يابوي مرحوم=عسى مقرك بجنات
جار النبي دايم الدوم=بدار السعد والكرامات

صح لسانك يا تركي وعلا شانك وغفر الله لوالدك واسكنه فسيح جناته


قصيدة رائعة اتت من القلب وترجمها تركي على الورق بمشاعر واحاسيس الحزين على والده

ومالك لايم ياتركي قد كفيت ووفيت وبيض الله وجهك وعليك وانت واخوتك بالدعاء لوالدكم ,,,جبر الله مصابكم

واحسن عزاءكم ....

ولك فائق التحية والتقدير