منتديات البدارين

أبـو حـربـي · 17-01-2007, 01:23 PM

بسم الله الرحمن الرحيم

البيت هذا لشالح بن حطاب بن هدلان القحطاني ولها قصه ونبي نذكرلكم قصتها والقصيده :::

شالح بن هدلان كان له أخو اسمه الفديع ,أصغر منه وكان شجاع وفارس , الفديع ذبحوه الحمده زعماء قبيلة عتيبه , وحزن عليه اخوه شالح وكتب فيه قصايد كثيره يرثيه ويتحسف عليه ,,,,

شالح بن هدلان عياله ثلاثه ,أكبرهم ذعار وأوسطهم ذيب وأصغرهم عبد الله, أخذ شالح يربيهم ويعلمهم الفروسيه,وتبين له وهم في سن الطفوله إن بينهم اللي بيعوضه عن أخوه الفديع,,,,,

برز ذيب في ميدان الفروسيه وكان مثلاً للشجاعه واشتهر ببره لوالديه , واشتهر أيضاً بالوفاء والعطف على جيرانه وبالكرم ....

وفي ليله كان ذيب وابوه شالح ساهرين ,وكان ابوه يمازحه ويداعبه ويلقي عليه الشعر فقال شالح::

يا ذيب أنا يا بوك حالي تردى = وانا عليك من المواجيب يا ذيب
تكسب لي اللي لاقح عقب عدَا = طويلة النسنوس حرشا عراقيب
تِجر ذيلٍ مثل حبل المَعَدا = وتبرى لحيران صغار حباحيب
واشري لك اللي ركضها ما تِقَدا = مَاحْدٍ لقى فيها عيوب وعذاريب
قَبَا على خيل المعادي تحدى = مثل الفهد توثب عليهم تواثيب
أنا اشهد انك باللوازم تسدا = وعز الله إنك خيرة الربع بالطيب
ياللي على ذيب السرايا تعدا = لو حال من دونه عيال معاطيب
لِيثٍ على درب المراجل مِقَدى = ما فيك يا ذيب السبايا عذاريب

وبعد ما قال أبوه القصيده من باب المزاح ,أسرها ذيب بنفسه , ويوم نام أبوه راح متخفي وركب قلوصه وامر بعض أخوياه انهم يرافقونه, وسألوا ذيب : وين رايحين ؟ قال ذيب : نبي نغزي عتيبه واباخذ خيار ابل عتيه لابوي ,, استمروا بسيرهم وعقب ثلاث ايام قصدوا بير ((مليه))في ديار عتيبه , ويوم انحدروا يمها ::شافوا عليها ورداً لعتيبه ,, رجع ذيب وخوياه علشان ما يشوفونهم ويبلغون القوم ,, احد الواردين على البير صياد ومعه بندقيته توجه للوادي اللي انحدر معه ذيب وخوياه ,,يدور الصيد ويوم شاف ذيب وجماعته اختفى تحت الشجره وأطلق عليهم عيار واراد الله أن يصيب ذيب إصابه مميته.

حلت الكارثه على شالح بن هدلان فقد أخوه وولده ,,وبدا شالح يتجرع الحزن ومآسي الفراق :::::

وهذي القصيده قالها في ولده ذيب ,,,,,

يا ربعنا ياللي على الفطر الشيب = عز الله إنه ضاع منكم وداعه
رحتوا على الطوعات مثل العياسيب = وجيتوا وخليتوا لقلبي بضاعه
خليتوا النادر بدار الاجانيب = وضاقت بي الآفاق عقب اتساعه
تِكدرن لي صافيات المشاريب = وبالعون شفت الذل عقب الشجاعه
يا ذيب أنا بوصيك لا تأكل الذيب = كم ليلةٍ عشاك عقب المجاعه
كم ليلةٍ عشاك حِرش العراقيب = وكم شيخ قومٍ كزته لك ذراعه
كفه بعدوانه شنيع المضاريب = ويسقي عدوه بالوغى سم ساعه
ويضحك ليا صكت عليه المغاليب = ويكلد على جمع العدو بِاندفاعه
وبيته لجيرانه يشيد على الطيب = وللضيف يبني في طويل الرقاعه
جرحي عطيب ولا بقى لي مقاضيب = وافخت حبل الوصل عقب انقطاعه
كني بعد فقده بحامي اللوهايب = وكني غريب الدار مالي جماعه
من عقب ذيب الخيل عِرْج مهاليب = يا هل الرمك ما عاد فيهن طماعه
قالو: تطيب وقلت:وش لون ابا طيب = وطلبت من عند الكريم الشفاعه

وأردفها بهذه القصيده وعلى نفس البحر والقافيه::::

ذيب عوى وانا على صوته اجيب = ومن ونتي جَضَتْ ضواري سباعه
عز الله اني جاهل ما اعلم الغيب = والغيب يعلم به حفيظ الداعه
يالله يا رزاق عِكْف المخاليب = يا محصي خلقه بببحره وقاعه
تفرج لمن صابه جُروحٍ معاطيب = مانيت من يشمت فعايل ذراعه
صار السبب مني على منقع الطيب = ونجمي طِمَنْ بالقاع عقب ارتفاعه
يا طول ما هجيتهن مع لواهيب = ولاني بداري كسْرها من ضلاعه
ويا طول ما نوختها تصرخ النيب = وزن البيوت اللي كبارٍ رباعه
واضوي عليهم كنهم لي معازيب = إليا رمى زين الوسايد قناعه
اضوي عليهم واتخطى الاطانيب = وآخذ مهاوية الجمل باندفاعه
أباانذر اللي من ربوعي يبا الطيب = لا ياخذ إلا من بيوت الشجاعه
يجي ولدها مْذرب كنه الذيب = عز َلبوه وكل ما قال طاعه
وبنت الردى ياتي ولدها مذرب كما المهيب = متحري متى يقدم متاعه

تقبلوا تحيـــــــــــــاتي