ابن قضعان

[اللهبي]

يقول من عدى على روس الطوال النايفات = من ضيقةٍ فالصدر كانيها وحزتها عصير
يا الله يا أعظم من الأسماء واجل من الصفات = يا الله يا الله ياسميع ويا بصير
يارب أجرني من عذاب القبر ما بعد الممات = وأغفر لأبي وأبيه وأخوانه وأجرهم يا مجير
يارب أنا عبدٍ خلقته من تراب وطيب ذات = ونفخت فيه الروح وانت اللي على ذلك قدير
يارب انا ما اخترت اكون الشاعر اللي قاسيات = الطرق يطرقها وتصبح له أرق من الحرير
أنت الذي خلقت كائن حي غير الكائنات = الحمد لك والشكر والمنه وخير الله كثير
يارب انا عبدك وأشيل من الذنوب الكايدات = ما لا تشيل الأرض والدنيا رحاها مستدير
يا رب انا شاعر وأهيم بكل وادي من شتات = واقول ما لا أفعل وانا مؤمن ولي قلب وضمير
شاعر ويتبعني من الغاوين كثر الغاويات = أذنب بهم وإن غرروا بي صرت اقل من الغرير
والشعر مثل السيف ابو حدين , وعيون البنات = ياليتها كانت مدى الشاعر ومرساه الأخير
ماكان جبت العيد .. والعذر البنات المترفات = إلين ماصرت الحكم بين المقّدي والضرير
البارحه هبت علي الريح من كل الجهات = حتى عرفت إن الليالي غير والوقفات غير
وقمت التفت للسنين اللي غدت مني فوات = وآمنت بان العمر مهما طال في الدنيا قصير
كلٍ يموت وينتهي والوقت يمضي هات هات = ولاعاد يبقى إلا الذكر إن كان شر أو كان خير
والشاعر أبقى بعد موته بالعلوم الطيبات = او عكسها والموت ياخذ والقصايد تستخير
أقرب مثال اللي لهم في البيت سبع معلقات = راحوا ولا زالت قصايدهم كما البدر المنير
الأعشى وعمرو وطرفه بن العبد والعبسي ثبات = والنابغه وابن ربيعه وابن أبي سلمى زهير
والشعر فضّل شاعره على سواه وله سمات = فضّل أبو الطيب وهو سقّا وأبو فراس أمير
والشعر مهما فضّل الشاعر مقام ودرجات = ما فضّله بالفعل في اليوم العبوس القمطرير
أقولها وانا اعرف إنها ماتلحفني العباة = اللي طرفها في يدي واكمامها ف ايد الوزير
لكن على الله يا متم الصوم ومقيم الصلاة = تدفى الكفوف الباردات ويجبر العظم الكسير
يا صاحبي يا حظي المكتوب يا أغلى الأمنيات = يا اجمل الصدفات لو ماجات يا السهل العسير
من صيف عاما ماخذاني عنك بعد ولا سبات = وانت تجاهلني وانا وضعي من اسبابك خطير
والحب ذنب مايكفرّة التجاهل والسكات = واجه .. في بيتك واحسم الموقف يصير اللي يصير
ولا تعلقني على أمل نجومٍ ساريات = وابقى على قول العرب : لو لا الأمل مات الفقير
يا سيدي يا أغلى السنين الماضيه والمقبلات = يا أعز وأغلى من على الدنيا برجلينه يسير
لا تحسب إني جاهلٍ بعض الأمور الخافيات = اللي تحدك وانت مالك من مخاليبي مطير
أدري واقدر واتحمل واتحاشى الانفلات = وإلا تراني في بعض الأحيان ما أطيع الشوير
والصبر مفتاح الفرج والقل جرّاح اللهات = وسهيل يبدي في السما .. ويهيج في الأرض البعير
وانا من اللي مجدهم على ظهور المسرجات = قومٍ مهي بتشد لا جاها من القوم النذير
وش عادني حيٍ على شانه ووش لي في الحياة = إن كانني لا سرّجتها ما أفرِّق الجمع الغفير
لعيون من حبه رسى مرسى الجبال الراسيات = وإليا اصطفق ماكنه إلا الموج في البحر الغزير

[العلالي يالبدراني العلالي]

صح السانك اخوي
مع تحياتي

لك الود

[السيسبان]

الاخ العزيز والمبدع

ابو فيصل

يعطيك الف عافية على النقل الذي يدل على ذائقه ولا اروع

وصح لسان الشاعر الكبير ضيدان



تقبل خالص الود

[عادل البدراني]

الاخ الغاالي

اللهبي


قصيدة رائعه وجميله

صح لسانك ولسان الشاعر


الله لايهينك ويعطيك العافيه

[ابن شنوت]

يعطيك العافيه اخووي اللهبي
اعتبر هذه القصيده هي تكرار للمعلقات السبع لكن بالشعر النبطي

في بدايتها وفي مراحلها الى نهايتها تشبه المعلقات

احفظ هذه القصيده من وقت طوووويل
واردد هذا البيت كثيرااااا

البارحه هبت علي الريح من كل الجهات
حتى عرفت إن الليالي غير والوقفات غير

صح لسانك ولسان الشاعر ضيدان بن قضعاان

وتقبل تحياااتي,,,