قصة الوليعي (( مسلم ))
شهيد الحب العذري
هذه القصة والقصيدة لأحد أفراد قبيلة جهينة العريقة ......
تدور أحداث هذه القصة في الزمن الماضي أي ما يقارب الـ200 سنة .....أترككم مع القصة :
هذا واحد من ابناء الباديه من قبيلة جهينة _وأغلب الظن حسب ما سمعت من كبار السن إنه من ( ذبيان ) من جهينة_
حول جبل رضوى شمال ينبع كان عمره 10 سنوات واسمه مسلم ولقب بعد القصه اللي صارت عليه بلقب
(( الوليعي مسلم)) لتولعه بمحبوبته .
وقصته انه كان يتيم وصغير بعمره وكانو ربعه باديه يربعون لين يوصلون الشفا بين تيما وحايل بوقت الربيع ثم
يرجعون لدياره وشاءت الاقدار بما انه يتيم انه يشتغل راعي
عند اقبيلة عنزه المجاوره لقبيلته وكانت تسرح معه بالبل بنت معزبه واسمها ظبيه وكانت اصغر منه بسنتين
وكانوا اطفال اذا حسبناها بوقتنا الحالي .
وكان يحب ظبيه وكل ما كبر يكبر حبها له لين اصبحوا في عز شبابهم لكن مايدري هل ظبيه تحبه والا لا فقرر انه
يسأل عجوز عنها قالت له انا مالك عندي علاج بس لك عندي خطه
والخطه هي انك تسوي نفسك مقروووص واللي يخاف عليك هو اللي راح يمص الدم عنك
وفعلا جا وسط البيوت وقام يصارخ ويسوي نفسه مقرووص وصاحو العرب يامن يمص له الدم ومع الصراخ تسللت
ظبيه مسرعه يوم شافت انه مسلم نقزت على ابهام رجله
وقامت تمص الدم فعرف انها تحبه
وراح للبل ولحقته ظبيه وكلمها بأمر الزواج وحبه لها سمعت اخت ظبيه الكلام وفزعت لابوها وقالت له ووصل الخبر
لعيال عمها فتوعدوه رجعت ظبيه وحست انهم دروا عنهم
رجعت لمسلم وقالت له اركب الذلول الفلاني وارجع لاهلك وحطت بخف الذلول ابره عشان يسرع
جو عيال عم ظبيه راكبين على الجيش ويحدون ويقولون مسلم لو مسكناه قطعنا كف يمناه
فركب على الذلول وراح لديرته برضوى ويوم وصل هناك كان له اخ من امه اسمه سويلم وكان هو اللي يداريه
ويعطف عليه .
لكن مسلم تغيرت حالته ولا يتكلم ولا ياكل حاولو بشتى الوسائل انه يتكلم بس ما تكلم وجلس مريض فتره طويله
ونحيل واخوه احتار بحالته وقرر انه يوديه لكاهنه عندهم قالت له
طلعه ضلع رضوى فووووق اذا كان عنده علم يبي يقوله لك واذا كان شاعر يبي يقول قصيده
وفعلا طلع اخو الوليعي رضوى واخذ معه مسلم وكان الوقت ربيع والجبل فوق سهل وله هويه كبيره اللي يطلع له
يمد نظره على مسافه بعيده ويوم طلعو فوق قام سويلم وشب النار
وسوا القهوه وللآن مسلم ما يتكلم وقال سويلم لمسلم انا ابروح اتقنص وانت خلك هنيا يبي عشان يبعد عنه ويسمعه
يمكن يقول شي وراح عنه
قام مسلم من مكانه وجا على راااس الهويه وجلس يخايل بعيونه فوق وتحت ومد نظره جهة ديار ظبيه وكأنها
يشوف الطلحه اللي كانو ينامون عندها ويتخيل ظبيه وايامها معه
وتكلم بس تكلم بقصيده والقصيده على طرق الهلاليين وطرق الهلالليين معروف و تقول القصيده :
يقول الوليعي والوليعـي مسلّـم من دامت ايـام الصبـا لـه دام
.
لو إن عجـات الصبـا يجبرنـه كما يجبر الجابـر كسيـر عظـام
.
ليالي الهوى مثل الربيع ليا زهى وش حيلتـي مـا للربيـع مقـام
.
قاري قراني يوم قرصت بهامـي غروٍصغيـر مـا عليـه لـثـام
.
قراني وهو يسفح من الدمع ناظره ليتـه قرانـي والعيـون نـيـام
.
رقيت في رضوى ورضوى منيفه وأخيل في عيني جنـوب وشـام
.
أخيل في عينـي طلحـة ناعميـة سـلام يـادار الحبيـب ســلام
.
يامرتـع للنـوق تـوي لقيـتـه في خشم و(علة) من يميـن ردام
.
ياليتنـي يـوم دنتنـي منيـتـي بديار (ظبية) عـن ديـار تهـام
.
أنا جيتكم من راس رضوى عشيّة كما شن غـربٍ بـاد منـه وذام
وهذا البيت الاخير قاله يوم نوى يرمي روحه من الجبل
احس اخوه انه يبي يرمي روحه من الجبل وركض عليه فعلا بس مالحق الا على عباته واخذها ونزل تحت لقى
مسلم ميت وراسه ما بقى منه الا جدايله وحزن عليه حزن شديد واخذ جدايله وحطها على
بدرره او شنه وركب الجمل اللي جا فيه مسلم من الديره اللي هو كان فيها وقال لازم اروح للمره اللي تسببت عليه
واشوفها
وفعلا راح يم ديرتهم وهو يعرفهم وسوا نفسه يدور له جمل وينشدالناس جت ظبيه من بين الناس له مسرعه قالت له
اسألك بالله راع القرون هذي حي والا ميت
قالها راعي الجدايل هذي جا مريض وما يتكلم وطلعناه راس رضوى وقال لها القصيده فما كان منها الا انها
شهقت وماتت
رجع سويلم اخو مسلم لديرته وكان متأثر بقصة الهوى هذي فتهيض ببيتين يقول فيها :
والله ما لوم الوليعـي ولـو طـااح من راس رضوى والعوض به عباته
.
مير اذهنوني عند هبـات الاريـااح لا ذب عمري ثـم اسـوي سواتـه
وسلامتكم هذي قصة الوليعي ,,,
الإهداءات
« آخـــر الـــمـــشـــاركــــات »
16-11-2006, 08:20 AM
قصة الوليعي ((مسلم))
العرض العادي
